Skip to Content

Hvað ef... Íslandssagan sem gæti hafa gerst, 29. jan. 2013

Erindið var í hinni sígildu hádegisfundaröð Sagnfræðingafélags Íslands. Myndina sem hér fylgir setti saman Ólafur Gunnar Guðlaugsson, sá ágæti grafíski hönnuður. Glærur sem stuðst var við má líta á hér (ekki voru þær allar sýndar, tímans vegna) en vitaskuld segja þær ekki alla söguna. Erindið var tekið upp og má nálgast upptökuna á heimasíðu Sagnfræðingafélagsins. Í kynningu á erindinu sagði svo:

Fólk hefur lengi velt því fyrir sér sem gæti hafa gerst í mannkynssögunni en gerðist ekki. Hvað hefði gerst ef Persar hefðu lagt Grikkland undir sig í fornöld? Hvað ef suðurríkin hefðu haft betur í bandarísku borgarstyrjöldinni? Hvað ef Hitler hefði fallið í fyrri heimsstyrjöldinni? Vissulega getur verið gaman að velta fyrir sér spurningum af þessu tagi en hafa þær eitthvert gildi í sagnfræði? Í erindinu verður komist að þeirri niðurstöðu að því megi hiklaust svara játandi. Hugleiðingar um það sem gæti hafa gerst hjálpa okkur til að skilja betur hvers vegna svo fór sem fór hverju sinni; hvað var nær óumflýjanlegt og hvað var eingöngu háð tilviljunum og duttlungum örlaganna. Nefnd verða nokkur dæmi úr Íslandssögunni þessu til stuðnings, allt frá þjóðveldi norrænna manna í Vesturheimi fyrir þúsund árum til þýsks hernáms í seinna stríði og bankahruns sem aldrei varð á okkar dögum.

Viðbót 8. febrúar 2013: Hér er athyglisverð viðbót við "hvað ef" hugleiðingar sem brenna á mörgum út af Icesave-deilunni.



Drupal vefsíða: Emstrur